Comunicado
aos traballadores.
Na última reunión do Comité de Empresa,
este Comité a iniciativa de CCOO, tomou a decisión con sete votos a favor, duas
abstencións e dous en contra de expulsar a CIG das comisións de traballo tales
como interpretación e vixiancia do convenio, comisión de ascensos, valoración
de postos, comisión de estudos, de préstamos, de igualdade, do fondo de axuda,
de formación ocupacional ou mesa polo emprego.
Os votos favorables foron os de CCOO e
APC, e as abstencións de UGT. A cuestión é que xa sexa por acción ou por
omisión o resto do Comité non quer que estemos presentes na maioria das
reunións e negociacións coa empresa, a lo menos das que cren ter capacidade para
botarnos fora, e nas que se tratan asuntos de moita relevancia para todos os
traballadores da fábrica.
Esta acción é unha clara
represalia por non sermos asinantes do
convenio colectivo. As razóns polas que non asinamos son de sobra coñecidas,
pero a cuestión é que se creen donos do Convenio, e non é así, o convenio é de
todos, guste ou non , e afectanos por igual aos traballadores da fábrica, para
mal ou para ben.
Entendemos esta expulsión como un
atentado aos dereitos dos traballadores, ao quedar unha sección sindical con
representación no Comité ao marxe de moitas decisións que se han de tomar nesas
comisións. Supón un ataque aos dereitos de todos, non só a nós como delegados
do Comité, porque unha conculcación dos dereitos de liberdade sindical non
afecta únicamente aos representantes dos traballadores senon aos propios
representados, ao conxunto dos traballadores que é de onde emanan estos
dereitos. Non somos nos os que mermamos en capacidade de representación, sodes
todos vos os que quedades un poco máis horfos en defensores dos dereitos
colectivos de todos.
É a nosa intención denunciar estes
feitos ante todos vos, para que teñades coñecemento de primeira man do que está
a acontecer no Comité de Empresa. Parece incríbel, por moitas discrepancias que
teñamos, que compañeiros de sindicatos que se autodefinen como "de clase",
queiran coartar a representación dunha parte dos traballadores. O sindicalismo de clase defínese polas accións,
non polas etiquetas, e nesta ocasión as súas accións etiquetáronos
definitivamente.
Queremos tamén compartir con vos que a
CIG non se vai resignar a esta situación e estamos estudando todas as
posibilidades de acción que temos para intentar revertir esta situación, e
seguiremos traballando agora máis que nunca para defender os dereitos
colectivos e de clase dos traballadores.
Recibide un
cordial saúdo, nacionalista e de clase.
