A folga convocada
polo Comité de empresa de Alcoa Inespal no departamento de electrólise quedou
finalmente desconvocada debido ao boicot da empresa, que impuxo uns servizos
mínimos do 100% e obriga a traballar ao persoal deste departamento como nunha
xornada habitual. Porén, en folgas anteriores, a dirección impuxera uns
servizos mínimos só destinados ao mantemento e seguridade das persoas e das
instalacións.
Estes servizos
mínimos, denuncia a Sección Sindical da CIG en Alcoa, non foron negociados coa
representación do persoal e resultan tan abusivos que para cumprilos, a
dirección mesmo tería que “contratar” persoal adicional para poder cubrir o
servizo.
A folga, cuxo
inicio estaba previsto para hoxe as oito da mañá, e cunha duración de catro
horas por quenda laboral durante catro días, foi convocada contra as
pretensións da empresa de aplicar unha modificación substancial das condicións
de traballo ao persoal deste departamento de maneira arbitraria e sen
negociación de ningún tipo.
A Sección Sindical
da CIG en Alcoa considera que estes servizos mínimos impostos pola empresa
supoñen un ataque frontal contra os dereitos dos/as traballadores/as ao dinamitar,
na práctica, o exercicio do dereito fundamental de folga.