A CIG valora o anuncio de Alcoa de retirar o ERE pero advirte que non haberá garantías de futuro até mudar o actual sistema tarifario

A Coruña, a 23 de decembro de 2014

A Sección Sindical da CIG en Alcoa Inespal valora moi positivamente o anuncio feito esta mesma tarde pola multinacional do aluminio de que retirará o ERE de extinción para a fábrica da Coruña, tras o resultado da segunda poxa da interrumpibilidade. Con esta decisión, engaden, garántese que a fábrica continúe aberta durante o 2015 e que se manteñan os 400 postos de traballo.

A empresa, segundo informou nesa reunión co Comité, comunicará a retirada do expediente ao Ministerio de Traballo, en canto a CNMV emita o ditame pertinente que confirma a validez da poxa. Unha resolución que se agarda estea nun par de días.

Porén, dende a representación da CIG poñen o punto de atención tamén sobre as consecuencias que o novo sistema de adxudicación terá nas condicións laborais, xa que dende a dirección se informou que o prezo acadado deixa as fábricas nunha “situación peor” polo que nun futuro non se descarta que a empresa pretenda tocar o convenio e aplicar un “aforro” de custes pola vía do recorte salarial. Tal e como xa aconteceu hai un ano.

En todo caso, dende a Sección Sindical advirten que o problema para a fábrica da Coruña, e por extensión para todas as factorías de Alcoa, non está resolto en tanto non se modifique o sistema de adxudicación da interrumpibilidade e todo o sistema tarifario. Pois, advirten, ao adxudicarse a interrumpibilidade de xeito anual, a empresa atoparase co mesmo problema do custe da enerxía o vindeiro ano.

Por iso, reclaman apertura dun debate social e político sobre a necesidade de contarmos cunha tarifa eléctrica galega que nos permita ter un prezo da enerxía máis baixo e que garanta a continuidade da actividade e dos empregos da nosa industria pesada.

A CIG promove concentracións o xoves 18 de decembro nas empresas con grandes consumos enerxéticos en demanda dunha Tarifa Eléctrica Galega

A central sindical defende a apertura dun debate político e social sobre a necesidade de termos unha enerxía máis barata 

A CIG ten convocadas para este xoves, 18 de decembro, concentracións nas industrias galegas con grandes consumos enerxéticos en demanda dunha Tarifa Eléctrica Galega que favoreza a continuidade do tecido industrial e o mantemento dos miles de empregos que xera. Unha reivindicación que a central nacionalista leva tempo defendendo e que hoxe está de primeirísima actualidade tras dos resultados das poxa de interrrumpibilidade, que algunhas destas empresas están a utilizar como escusa para xustificar a aplicación de EREs, modificacións das condicións laborais e mesmo peches de fábricas.

As concentracións realizaranse coincidindo cos cambios de quendas nos seguintes horarios e fábricas:

• Ferroátlantica (Sabón e Cee): ás 13:45 horas.
• Celsa Atlantic (A Laracha):  a partir das 13 horas.
• Alcoa (A Coruña e San Cibrao): a partir das 13 horas.
• SGL Carbón (A Coruña): súmase á protesta de Alcoa Inespal.
• Megasa (Narón): ás 13 horas.

Estas mobilizacións enmárcanse nunha campaña que a CIG vén de pór en marcha para levar ao debate político e social a necesidade de contar cunha Tarifa Eléctrica Galega que nos permita obter unha enerxía máis barata. Por iso, alén das concentracións nas empresas que máis directamente afectadas poidan estar polo prezo da enerxía, a central sindical tamén promoverá posicionamentos das Corporacións locais e mobilizacións nos Concellos onde se asentan estas fábricas. Así, xa está acordada unha primeira xornada de concentracións para o día 16 de xaneiro, ás 19:00 horas, diante dos concellos nos que están as fábricas mencionadas.

A reivindicación dunha Tarifa Eléctrica Galega xa estaba presente na ILP de 100 medidas para a creación de emprego en Galiza que a central nacionalista defendeu no Parlamento en abril deste ano, e a través da que se propoñía unha rebaixa nas peaxes do 30%. Unha iniciativa lexislativa popular que, hai que subliñar, foi rexeitada cos votos en contra do PP.

Cómpre lembrar que a tarifa eléctrica soporta unha cantidade de extracustes que Galiza tamén ten que abonar, aínda sendo produtora e excedentaria de enerxía ano tras ano. É dicir, pagamos os custes da extrapeninsulariedade ou do  transporte, como calquera outro territorio non produtor, mais non obtemos ningún beneficio ou contraprestación. Somos solidarios no mantemento do sistema e a maiores cargamos con todo o custe social e medioambiental que deriva da especialización forzada que dende o estado se deseñou neste sector.

A demanda da CIG non é unha entelequia se hai vontade política. E así o demostra o pacto ao que chegou o PNV co goberno español para realizar unha modificación na definición da alta tensión, que podería supor unha rebaixa das peaxes do 50% en dous anos.

Por iso, a CIG demanda a apertura dun debate político e social sobre a necesidade de termos unha enerxía máis barata para o consumo doméstico, par defender a nosa cativa industria, para favorecer os nosos sectores produtivos básicos e porque non podemos consentir que se esquilmen os nosos recursos naturais, se leven os beneficios lonxe de Galiza e, ao tempo, se poñan impedimentos á nosa capacidade de producir. 

Interpelación no congreso do BNG sobre a interrupibilidade e as consecuencias na industria Galega

Comunicado da dirección para o inicio do proceso de despido colectivo

Polo momento non nos deron mais datos,este proceso iniciouse conxuntamente ca planta de Avilés afectando a máis de 800 empregos directos.

Tamén a empresa manifestou que se durante este período se acadaba un resultado mellor coa celebración da anunciada segunda poxa (prevista para mediados de mes) ou outra oportunidade que se presente ,podería retomar a produción nas citadas plantas.

Pero que de calquera maneira de celebrarse a segunda poxa nas actuais condicións e non conseguisen o prezo desexado non se solucionaría o problema e continuarían adiante co proceso.

A reunión do comunicado para o Martes día 2 en Madrid cos comités das dúas plantas pospúxose, polo que sigue adiante a asemblea prevista para ese día en horarios de 10:30  horas e 17:30 horas, tal e como estaba anunciado,pregamos a maior asistencia debido a importancia do asunto a tratar.

O goberno de España quere afundir a industria pesada.

As últimas novas recibidas da poxa da interrumpibilidade non poden ser máis preocupantes.Segundo confirmou a dirección da empresa o resultado desa poxa foi que tanto a nosa planta como a de Avilés quedaron sen interrumpibilidade e San Cibrao conseguiu tres paquetes de 90 Mw de catro que necesitaba. Parece ser que  que o goberno podería facer unha segunda poxa, xa que quedaron sen adxudicar 200 millóns de euros.

A cuestión é que prezo conseguiu San Cibrao, e que prezo conseguiría a planta da Coruña nesa segunda oportunidade. Parece claro que os tres paquetes de 90 que van para a Mariña foron os derradeiros da poxa e a un prezo inferior o desexable. Se hai unha repesca, entendemos que o prezo de saída non será superior ao conseguido na primeira, senón as outras empresas poderían alegar que as timaron.

A única certeza que temos é que  este sistema de reparto da interrumpibilidade e a regulación de todo o sistema eléctrico forman un sistema demencial, que foi creado polo PP a finais dos anos noventa e conservado por todos os gobernos seguintes, e que o Ministro de Desindustria Soria está a enrevesalo aínda máis se cabe. O resultado desta última tolería era totalmente previsible. A ocorrencia de facer unha poxa ao revés, na que soamente hai un comprador e un montón de vendedores con necesidades moi diferentes, e sabendo por anticipado que había máis demanda que oferta,  e dicir, que non había café para todos, que algúns ían pasar lambendo, facíanos temer o resultado que finalmente se deu.

Temos que exixir ao goberno que rectifique, porque desta forma vai destruír toda a gran industria, especialmente a nosa, que é a máis dependente dos custos enerxéticos e a máis prexudicada deste reparto. Ademais do aumento dos custos estaría a inseguridade permanente de non saber a que prezo van pagar a enerxía o ano seguinte, porque esta poxa repetirase todos os anos


E totalmente imposible facelo peor. Non existe no universo un goberno de calquera ideoloxía política que  poda superar tamaña estupidez. Imposible.


Con este goberno imos de cu.

Soberanía enerxética xa!

Reforma das mutuas do goberno do PP

En pleno mes de xullo o PP puxo unha reforma da lei de mutuas que constitúe unha nova agresión os dereitos dos traballadores,afondando na privatización do sistema da seguridade social e da sanidade,primando unha vez mais os intereses económicos privados sobre os dereitos da clase traballadora, creando asi un novo negocio a conta da privatización da nosa saúde.

Sentenza favorable ós traballadores no xuizo pola prima de resultados

Xa temos resolución do xuízo pola modificación da prima de resultados, e a xustiza neste caso dounos a razón a tódolos traballadores, polo tema de cambio de parámetros por parte da empresa para así poder reducir a contía a pagar a tódolos traballadores,o xuíz se basease nos seguintes puntos para darnos a razón:

1. O parámetro de "marxe neto" foi incluído a finais de ano polo que os traballadores ata esa data no puideron influír nel, contradicindo o artigo 34 do convenio.
2. Os resultados máximos que propoñía ese concepto eran inalcanzables a esas alturas de ano.
3. Os conceptos nos que se basea o "marxe neto" tales coma o prezo da enerxía e das materias primas non son influenciables polos traballadores e ademais xa estaban incluídos en outros parámetros tales como os custos de conversión.
4. O parámetro non é comprensible para os traballadores xa que a empresa non entregara nin sequera na data do xuízo, as contas da empresa de dito ano ós representantes dos traballadores a pesares de pedírllelas en varias ocasións.

Por todo elo a empresa esta obrigada a pagar a prima de resultados sen incluír o novo concepto, aínda que pode recorrer a sentenza.

Xuízo polo cambio de parámetros na prima de competitividade

Hoxe celebrouse o xuízo pola demanda interposta por todas as centrais sindicais presentes na nosa fábrica (agás APC) contra a empresa, pola modificación da prima de competitividade do ano 2013 e calculamos que antes de final de ano sairá sentencia sobre o mesmo,recordamos que a modificación a meteu a empresa a raíz do resultado do laudo sobre a inaplicación do convenio de ese ano, que non lle foi favorable ,obrigando a empresa a abonala tal como di o convenio, polo que decidiu incluír un novo parámetro denominado "marxe neto" para rebaixar a contía da prima ,un parámetro este, totalmente opaco ,que  descoñecemos como se calcula,xa que non nos dan ningún tipo de dato para poder calculalo nós mesmos, polo que aceptar a cifra que nos dan ,convertese nun acto de fe.
Este parámetro ademais está baseado sobre previsións que fan eles non se sabe moi ben como e non sobre contas reais,parámetro por outra banda no que non temos ningún tipo de influencia, xa que esta condicionado por factores externos o noso traballo,tales como prezo da enerxía, das materias primas,LME,paridade euro-dolar etc. contradicindo o espírito da prima reflectido no convenio (art.34) que é premiar a calidade e cantidade do traballo realizado polos traballadores o longo do ano con parámetros comprensibles por tódolos traballadores.

Cambios propostos no servizo médico

Xa fai un mes que a empresa propuxo ó comité un cambio no servizo médico, ata o de agora non nos pronunciamos sobre o tema porque non sabiamos exactamente o que andaban a buscar xa que as opcións que nos deron (para aforar custes segundo eles) eran totalmente opostas.
Na primeira reunión que mantivemos coa dirección, propuxéronos un cambio no servizo médico debido segundo eles a o alto custe que tiña a nosa fábrica,dicindo que o seu custo por persoa era o dobre que Avilés e San Cibrao,(cousa que dubidamos ata que nos ensinen as cifras reais) e ademais nos puxeron uns exemplos absurdos de outras empresas que a maioría de elas nin sequera están obrigadas a ter servizo médico propio, debido o seu numero de traballadores (menos de 250) ou pola actividade que realizan.
Nesta primeira reunión a dirección propoñía dúas alternativas:
 -Primeira opción: Suprimir o ATS en quendas de tarde e noite, asi como os fins de semana,segundo eles porque hai menos xente traballando (esquecesen que a necesidade dun servizo médico non ten que ver só co número de xente traballando senón co risco que corren), no seu lugar os xefes de quenda con un manual guiaburros e a chave do botiquín serían os encargados de decidir a gravidade do accidentado, prestarlle os primeiros auxilios e estabilizalo, ata a chegada da ambulancia ,que ademais terían que chamar eles, e segundo a gravidade do accidentado elixirían unha ambulancia privada concertada para os casos mais leves e as UVI´s móbiles do 061 nos casos mais graves,incrible que os médicos perdan unha década da sua vida formándose cando con este manual en cinco minutos poden socorrer a calquera accidentado.
Ademais todos os traballadores terían que facer un curso de primeiros auxilios de dúas horas para poder botar unha man (non sabemos a onde con tremenda formación) en caso de accidente.
Por si iso fora pouco en casos de enfermidade común tamén serian os xefes de quenda os encargados de decidir si pode seguir traballando ou non.
Cal foi a nosa sorpresa que aínda sin chegar a explicarnos ben a segunda opción practicamente o día seguinte xa sacan unhas charlas para que os xefes de quenda expliquen o novo funcionamento do servizo médico baseado nesta primeira opción sin os ATS de quenda.
Ante semellante despropósito o pleno do comité negouse en redondo, e chegamos o acordo por unanimidade de tomar as medidas que fagan falta para evitar esa situación que suporía unha desprotección total para os traballadores a quendas,ante iso a empresa parece que temporalmente desistiu de implantar inmediatamente esa opción e formuloumos algo mais en serio a segunda opción ,o Autoseguro.
 -Segunda opción:Facernos entidade colaboradora da seguridade social e facer un Autoseguro como teñen Avilés e San Cibrao.
Nesta opción parte dos cartos que destina a empresa a seguridade social e a mutua irían para unha especie de fondo xestionado pola empresa para facer fronte as incapacidades temporais derivadas de accidentes de traballo,non cubriría enfermidade común ,nin incapacidades permanentes,ou morte que as cubriría a SS e a mutua.
Para facerse entidade colaboradora da SS,habería que adecuar as instalacións do servizo médico da fábrica ampliándoas para poder dar un maior grado de cobertura sanitaria os traballadores nas propias instalacións,mantendo a atención as 24 horas do día os 365 días do ano igual que agora.
Ademais habería que manter concertos con centros de fisioterapia,ortopedia,radioloxía e cirurxía plástica,asi como con un hospital privado para casos graves (posiblemente o Modelo) e un centro hospitalario da SS ( J. Canalejo) para os casos de extremada gravidade.
Esta opción si no la chegan a detallar pormenorizadamente sería unha opción a considerar xa que os centros de traballo que a teñen a nivel nacional(a maioría de empresas públicas así como Avilés e San Cibrao) parece que funciona bastante ben e se acortan moito os tempos de atención sobre todo a hora de facer determinadas probas médicas, obter próteses, etc, que coas mutuas e case imposible conseguir hoxe en día.

Despois de tres reunións ca dirección o longo do mes pasado, agora temos claro que a intención da empresa é simplemente  deixar as quendas sin servizo médico ,xa que non se ve ningún movemento por parte da empresa para adoptar a opción do autoseguro (que por certo xa lles foi denegada no ano 1996 por non cumprir os requisitos básicos), ante esta situación esta sección sindical quere amosar o seu mais absoluto rexeitamento e fará todo o posible para impedir que a empresa leve a cabo esta reforma, deixando a xente que traballa a quendas desprotexida totalmente en caso de teren un accidente.

Manifestación contra a represión sindical

 

MOBILÍZATE,a manifestación sairá o 30 de Xuño as 20:00 h. dende a casa do Mar en dirección a delegación de Goberno .